Ecloga, oder Hirten gespräch, darin zvveen Hirten Damon, vnd Halton jhre gaben erzehlen: so sie dem Christkindelein schencken vvöllen
1.
Als nach verbrachten Reysen
Bey frembden sternen-brand/
Die König drey/ die Weisen/
Gar fern auß Morgen-land/
Dem Kindlein new geboren
Zum opffer brachten dar/
Die dreyfach außerkohren
Vnd außerlesen wahr.
2.
Gleich auch gezogen kamen
Zween frommer Hirten werth/
Mein Halton/ vnd der Damen/
Mit wol bewollter Heerd:
Auch dachtens darzubringen
Dem schönen Kindelein
[213]Gar viel der schönen dingen
So Sie gesa ilet ein.
3.
Die Gaben all mit namen/
Die Bäurisch Hirten Schätz
Verfaßten sie zusamen
In süsses Reym-geschwätz;
Jetz/ jetzt wil ichs erholen
Frisch/ frewdig von gemüt/
Vnd spielens offtermohlen
Wan ich der Schäfflein hüt.
Der Hirt Damon hebet an.
Wolan ich jhm wil schencken
Ein silber-weisses Lamm:
Als vil mich kan bedencken/
Kein edlers nie bekam.
Jhm kombt an lincker seiten
Von blut ein schöner fleck/
Weis nit waß mög bedeiten/
Waß je darhinden steck.
Der Hirt Halton.
Auch ich wil jhm dan schencken
Ein saugends Kälbelein/
Mit bänden vberschrencken
Wil dem die Füßlein sein:
Vnd also dan wils tragen
[214]Gefüg auff meinem halß;
Ich weiß wird jhm behagen;
Wil wetten jhm gefalls.
Der Hirt Damon.
Vnd ich wil jhm noch schencken
Ein Kitzlein sampt der Geiß/
Die muß es je noch träncken
Auß jhren Dütten weiß.
Die Brüst es selber findet/
Vnd kan sie lären schon;
Ja schon sichs vberwindet/
Vnd wird der Weid gewon.
Der Hirt Halton.
Vnd ich wil jhm noch schencken
Ein rothes Hirschen-kalb.
An Schenckel/ vnd Gelencken
Es ist vollwachsen halb.
Es mir auff grüner Gassen
Im Wald entgegen kam/
Sichs ließ mit Stricken fassen/
Gieng mit/ vnd wurde zahm.
Der Hirt Damon.
Vnd ich wil jhm noch schencken
Es ist von tausent räncken/
Von frisch/ vnd leichtem sinn.
[215]Es lauffet/ springt/ vnd spielet/
Auch tro ilets eigentlich/
Die streich zum boden zihlet
Mit füssen meisterlich.
Halton.
Vnd ich wil jhm noch schencken
Ein schöns Eichhörnelein;
Ist auch von manchen schwencken
Ein hurtigs meisterlein/
Ich seiner offt muß lachen/
Wans nur die Nüßlein pact/
Vnd schnell sie thut erkrachen/
Trick/ track/ wol just zum tact.
Damon.
Vnd jch wil jhm noch schencken
Ein zahmes Häselein;
Sichs last mit händen fencken
Wil stäts bein menschen sein.
Es wird beym kripplein lauffen/
Wird spielend jmmerdar
Hin/ her/ zu/ ab/ vnd auffen
Recht/ munter springen zwar.
Halton.
Vnd ich wil jhm noch schencken
Ein wachtsams Hündelein:
Daß lernet zancken/ zäncken;
[216]Die Schaff auch treiben ein.
Wans kombt zu seinen tagen/
Wirds freilich sein gefaßt
Von Schaffen zu verjagen
Den vnbenandten gast.
Damon.
Vnd ich wil jhm noch schencken
Ein mausigs Kätzelein:
Kein härlein jhm darff kräncken/
Halton/ dein hündelein.
Sichs hat noch nie lan beissen/
Sichs allen widersetzt:
Sichs bürsten thut vnd spreissen/
Bleibt allweg vnverletzt.
Halton.
Vnd ich wil jhm noch schencken
Ein stücklein gleicherley:
Mein/ soltest wol gedencken
Was je dan solches sey?
Zu deinem Kätzlein eben
Auch ich wil jhm zugleich
So wird es noch so reich.
Damon.
Vnd ich wil jhm noch schencken
Ein munters Täubelein/
[217]Das laufft auff tisch/ vnd bäncken
Mit seinem schwesterlein.
Auß pflaum- vnd feder seyden/
Von farben vnbewust/
Ein ringlein jhnen beyden
Bezircklet halß/ vnd brust.
Halton.
Vnd ich wil jhm noch schencken
Zwo Turtel-tauben keusch:
Die spreiten/ heben/ sencken
Die flügel ohn gereusch.
Jhr stimm/ so vil man spüret/
Nur lauter seufftzer sein:
Wer weiß waß leyd sie rühret/
Waß lieb/ vnd hertzen-pein?
Damon.
Vnd ich wil jhm noch schencken
Ein grossen Hüner-Han;
Der haupt/ vnd halß geht schwencken/
Als nie kein edler Schwan.
Mit bunten füß- vnd sporen
Er tritt gar stoltz herein;
Wan schon er wär verloren/
Man kent die farben sein.
Halton.
Vnd ich wil jhm noch schencken
[218]Ein Finck/ vnd Nachtigal;
So kopff/ vnd ohren lencken
Zu meinem hirten-schall.
Wan jhnn ich vor wil singen/
Drey/ vier/ or fünffmahl nur/
Sie gleich mir nach thun springen
In selben noten spur.
Damon.
Vnd ich wil jhm noch schencken
Drey Meysen/ Lerch/ vnd Specht:
Ich habs von einem Encken/
Von einem Acker-knecht.
Er glücklich hats gefangen/
Doch nit ohn list/ vnd müh/
Als newlich er war gangen
Zum holtz in aller früh.
Halton.
Vnd ich wil jhm noch schencken
Ein weisses körbelein:
An balcken soll mans hencken/
Vol kleiner vögelein.
Ich selber habs geschnitzet/
In siebenthalben tag:
Ist new/ noch vnbeschmitzet;
Nit gnug mans loben mag.
[219] Der Damon.
Vnd ich wil jhm noch schencken
Ein starcken Hirten-steck:
Mit farben jhn wil sprencken/
Gebrennt mit fewr/ vnd speck:
Die kunst ich newlich lernet/
Wie recht mans machen soll/
Daß gantz er werd besternet/
Mit bunten flecklein toll.
Der Halton.
Vnd ich wil jhm noch schencken
Ein gelben Sonn-Compaß/
Daß zünglein sich verrencken
Laßt nie von seinem spaß.
Sichs reget stäts/ vnd neiget
Zur just geraden schnur/
Biß lang der faden zeiget
Die rechte stund/ vnd vhr.
Der Damon.
Vnd ich wil jhm noch schencken
Viel schöner sachen mehr:
Ja schencken/ vnd noch schencken
Je mehr/ vnd je noch mehr.
Auch Oeppfel/ Nüß/ vnd Bieren
Milch/ honig/ butter/ käß.
Vnd waß noch mehr möcht zieren
Die Taffel mir gemäß.
[220] Der Halton.
Wol da dan/ laßt vns reysen
Zum schönen Kindelein:
Vnd laßt die Gaben weisen
Dem kleinen Schäfferlein:
Jhms alles auff soll heben
Die Mutter/ mit bescheidt/
Daß jhm es werd gegeben
Hernach zu seiner zeit.