[265] 742. Der frevelnde Bäcker zu Zell.

Mündlich. (W.M.v.d. Vor.)

In der heilige Christnacht derfa die Becka (Bäcker) nix back. Do is e mol vor Alters in Zell a Beckaborsch gewest. Den hat der Teifel eigeblosa g'hatt, wenn er in der Christnacht Broad backet, wäret er en großa Schatz fina. Der Borsch is Nachts aufg'stanna, und wie er runter nei die Backstuba kumma is, hat er g'sehna, daß sei Herr es Mehl in sein Kaste eig'schlossa g'hatt hatt. Wie er des g'sehna hat, is er glei zorni worn und hat g'flucht: »Jetzt sell aber der Teifel a neischlag!« Jetzt is er vor die Thier von sein Herrn ganga, hat geklopft und hat neigeruffa: »Meister, ihr hat es Mehl eig'schlossa, und i will doch mischa geha.« – »Heit werd ja nix gebacka« – ruft ihn der Herr zua. Ueber e Weil kummt der Borsch wieder geloffa, klopft an sein Herrn sei Stubathier und ruft: »Meister, ihr hat ja es Mehl eig'schlossa, und i will doch mischa geha.« – »Heit werd ja nix gebacka« – ruft der zorni. – Ueber e Weil kummt der Borsch zum dritta Mal geloffa, klopft an sein Herrn sei Stubathier und ruft noch a mol: »Meister, ihr hat ja's Mehl eig'schlossa und i muß doch mischa geha.« – Zorni ruft jetzt der Meister aus: »So geha in drei Teifels Nama und misch; da hast e di Schlissel, we mer vor dir doch gar ke Ruh hat.« – Der Borsch hat die Schlissel zun Mehlkasta genumma und is fortganga. E Weil drauf hat mer in der Backstuba semmern (jammern) g'hert; doa hat der Teifel en Beckaborsch neigemischt, und wie mer frua an Backofa hikumma is, warn Fetza von seina Kleeder und a paar Knocha dortgelega; denn es hat der Teifel in der heilige Christnacht über die Frevler Gewalt.