Auff hn. Augustin Klüppels/ vnd jungfraw Dorotheen Schultzen hochzeit:
Wer hätte dis gedacht? den Arete geehret/
Den Agerona küsst; Apollo selber lehret/
Moratæ lieben sohn/ vnd den dem alle neun
Pieriden geweist jhr Griechisch vnd Latein/
Beneben vieler kunst: der/ was da ist geschehen
In alt-Italien vnd Franckreich/ hat gesehen/
Auch wo die Säine theilt Pariß die grosse stat/
Der Niederlandt durchreist/ vnd recht erfahren hat/
Was recht vnd vnrecht ist/ der dem/ was Vlpianus
Vulteius/ Bartolus vnd der Justinianus
Ein keiser/ hat gelehrt/ ergeben gar vnd gantz
Dem setzet Venus auf einn grünen myrtenkrantz:
Ey/ ey/ wie nun? ist denn kein einiges gesetze
Im rechtes-cörper nicht/ das durch – die starcken netze
Der liebe – reißen kan? hilfft denn nun kein Latein
Für herbe süßigkeit/ für süsse liebes-pein?
Herr bräutigam ist dis das eifrige studieren?
Ist dis der lorbeerkrantz/ mit dem euch wolte zieren
Minerva? folget dis auff ewre weite reis'?
Ist dis all' ewre müh'/ ewr vngesparter fleiss?
Ist dis der milde schweiss/ der ewre bleiche wangen
Beflossen hat? ist dis/ was ich nähst angefangen/
Von euch/ o werther freund/ zu bringen in dis lied?
Welchs mir Apollo wol drey dreymal wieder-rieth.
Die weil mich selben tag aus Castalis zutrincken/
Die Venus abgelockt mit schmeichellichem wincken/
[57]Also/ daß dieses lied/ nicht war/ wie sichs gebürt/
Mit Hemus-blümelein poëtisch ausgeziert.