Gůter freundt ist besser dann silber vnd goldt.

In allem anligen vnnd nöten hat einer züflucht zu seinem gůten freund / findet auch rath vnd hülff bei jm /welches er sonst weder bei silber noch gold findet. So ist es auch ein tröstlich ding auff erden / daß wir iemand haben / dem wir vnser anligen trewlich eröffnen / klagen / vnd anzeygen mögen / on scheuhe vnd sorg. Vnd wem ein solcher begegnet / der mag in wol in ehren halten / dann sie seind seltzam. Gold vnnd silber mögen einen wol reich machen / speisen / träncken / vnd kleyden / auch vor armůt behüten / weil es wehret / Aber ein gůter freundt / der stehet vnd helt bei vns in aller not / es sei gleich gold oder silber da /oder nit da. Gold vnnd silber kan vns lassen / aber ein gůter freundt laßt vns nit. Darumb ist er auch besser dann silber vnd goldt. Salomon sagt: Das hertz frewet sich der salben vnnd räuchwerck / aber ein freundt ist lieblich vmb raths willen der seelen.