Wol vorgehn macht wol folgen.
Bonus dux bonum reddit comitem.

Wer wol vor kan gehen / der kan wol nach gehen. Ein gůter vorgenger macht einn gůten nachuolger. Ein gůter meyster macht gůte jünger. Ein frommer man zeucht ein fromm weib. Wie das haupt / also die glider / [142] Wie der Fürst / also das volck / Wie der vorgeher / also die nachsteher / Gehet wol voran / so volget rechts hinach gehen. Ein freudiger hauptman macht freudig kriegsleut. Daher sagt jhener / es were grewlicher / ein hauff hirsch / dem ein Löw vorgieng / denn ein hauff Löwen / dem ein hirsch vorgieng / Jetz begern vil vorsteher vil von den volgern / des sie mit eimfinger nit anregen. Es heyßt I præ, sequar, Gehe voran / so wil ich nach hin gehn.