Es gehört nicht auff alle fragen antwort.

Avff narren fragen gehört kein antwort / dann es bessert nit / Zu dem / so sol iederman bedencken / wie /was / vnn von wem / auch wouon / oder warumb er gefragt wirt / Von Gott vnd dem Christlichen glauben / sol mann bereyt sein antwort zugeben / eim ieden /der es begert / sagt Sanct Peter / Deßgleichen vō allem dem / das vns Gott hat wissen lassen.

Hiernach sol mann fragen / vnnd on vnderlaß diß leeren / vermanen / vnd alle welt / die darnach fragt /berichten vnd beantworten. Das er vns nicht hat offenbaret / nach dem sollen wir auch nicht fragen / sondern gern nicht forschen / noch wissen wöllen. Dann da Heua nach dem willen Gottes fragt / vnd sie die alte Schlang darauff fürete / da ward es war / was Salomon sagt / Qui serutator est maiestatis, opprimetur à gloria, Wer die Maiestat forschet / den wirt sie beschwern / vnnd zu boden trucken.

Fraget dich auch iemandt / daß er dich fahen wil /vnnd dir die zunge auß dem hals ziehen / so halt dein antwort an dich / dann du wirst dir mit dem mehr schadens denn frommen thůn / wie dann die welt / als das schnöd vngezifer / des vortheyls voll ist / andere zugefahren vnd zubetriegen / wie es ein ieder / der ein wenig vnder den leuten gewesen ist / vnd in der welt sein můß / an jm selbs vnd an andern leuten / wol wirt erfaren haben.