Eilen thet nie kein gůt.
Canis festinans cæcos parit catulos.

Eile sehr brach den hals. Von eilen kam nie kein gůts. Eilen verfürt die Eulen. Verstehe daß sie etwa vor nachts außfliehen / vnnd von allen vögeln durchächtet werden. Eil mit weil. All ding wil rath vor der that haben. Die that aber sol dem rath in eil folgen / sonst wirt ein cras cras drauß / vnd geschicht nimmermehr.Qui nō est hodie, cras minus aptus [62] erit. Wann ein ding in die langen trugen kompt / vnn nit in der ersten hitz wirt abtruckt / vnd geschmidet / wirt nicht leicht mehr etwas drauß. Darumb fellt bede / zuuil eil vnnd fleiß auff dem eiß / bricht übriger fleiß vnd eil / ebē so wol das Cristallin glaß / als Hans vnfleiß vnd Cüntz onsorg. Doch gemeynlich wer eilt ist vnfürsichtig / darumb kein wunder / so er ein sach nit recht außricht / vnn schaden nimpt.