Hundert jar vnrecht / ward nie kein stund recht.

Recht bleibt allzeit vnd ewig recht / es kan auch nit vnrecht werden / vnd wenn es vil tausent jar für vnrecht ist gehalten. Diß ist ein starcke erfarung / wie die warheyt allzeit obsiget / denn recht ist warheyt /warheyt ist recht. Recht isr das / das weder Got noch menschē / weder vernunfft noch menschliche natur tadeln kan. Wider dises hilfft kein prescription / [32] kein lange zeit / vnd wenn es auch vil tausent jar weret /So kan doch die zeit kein creatur billichen / daß recht sol vnrecht sein / der zeit halben. Was recht ist gewesen zu Adams zeiten / das ist vnnd bleibt recht biß ann jüngsten tag / ja wenns gleich alle welt für vnrecht helt. Es sagen die Alten / daß die Warheyt der zeit tochter sei. Alle Propheten / Christus Gottes son selbs / alle Aposteln hetten recht / vnd můsten ein zeitlang vnrecht behalten / aber endtlich ist doch jr recht / recht bliebē / vnd wirt ewig recht bleiben.