Śivasaṃkalpopaniṣad

Header

Data entry: Maximilian Mehner

Contribution: Maximilian Mehner

Date of this version: 2019-11-01

Source:

Scheftelowitz, Isidor: »Śivasaṅkalpopaniṣad.« In: Zeitschrift der Deutschen Morgenländischen Gesellschaft 75 (1921), pp. 201-212.

Publisher: Göttingen Register of Electronic Texts in Indian Languages (GRETIL), SUB Göttingen

Licence:

Distributed under a Creative Commons Attribution-NonCommercial-ShareAlike 4.0 International License.

Interpretive markup: none

Revisions:

2025-05-20: Added BK, GND and ISO code for language.

Text

yénedám bhūtáṃ bhúvanaṃ bhaviṣyát párigṛhītam amṛ́tena sárvam,
yéna yajñás tāyáte saptáhótā tan me mánaś śivásaṅkalpam astu. ŚSU_1

yéna kármāṇy apáso manīṣíṇo yajñé kṛṇvánti vidátheṣu dhī́rāḥ,
yád apūrváṃ yyakṣám antáḫ prajānān tán me mánaś śivásaṅkalpam astu, ŚSU_2

yát prajñā́nam utá céto dhṛ́tiś ca yaj jyótir antár amṛ́taṃ prajā́su,
yásmān ná ṛté kíñ caná kárma kriyáte tán me mánaś śivásaṅkalpam astu. ŚSU_3

yáj jā́grato dūrám udaíti daívaṃ tád u suptásya táthaivaíti,
dūraṅgamáṃ jyótiṣāṃ jyótir ékaṃ tán me mánaś śivásaṅkalpam astu. ŚSU_4

yásmin ṛ́cas sā́ma yájūṃṣi yásmin prátiṣṭhitā rathanābhā́v ivārā́ḥ
yásmim̐ś cittáṃ sárvam ótam prajānān tán me mánaś śivásaṅkalpam astu. ŚSU_5

suṣārathír áśvān iva yán manuṣyā́n nenīyátebhī́śubhir vājína iva
hṛtprátiṣṭhaṃ yyád ajiráñ jáviṣṭhan tán me mánaś śivásaṅkalpam astu. ŚSU_6

yád átra ṣaṣṭháṃ triśatám̐ śarīráṃ yajñásya gúhyan návanā́bham ā́dyam,
dáśa pañcatrim̐śátaṃ yyát paráñ ca tán me mánaś śivásaṅkalpam astu. ŚSU_7

yé páñca pañcā́ daśatám̐ śatáṃ ca sahásraṃ ca niyútaṃ nyárbudaṃ ca,
te yajñacittéṣṭakāttám̐ śárīraṃ tán me mánaś śivásaṅkalpam astu. ŚSU_8

védāhám etáṃ púruṣaṃ mahā́ntam ādityávarṇan támasaḫ parástāt,
tásya yóniṃ paripaśyanti dhī́rās tán me mánaś śivásaṅkalpam astu. ŚSU_9

yéna kármāṇi prácaranti dhīrā víprā vācā́ mánasā kármaṇā ca,
saṃvvídam ánu sáṃyyanti prāṇínas tán me mánaś śivásaṅkalpam astu. ŚSU_10

yé máno hṛ́dayaṃ yyé ca devā́ yé antárikṣe bahudhā́ cáranti,
yé śrotráṃ cakṣúṣī sáñcaranti tán me mánaś śivásaṅkalpam astu. ŚSU_11

yéna dyaúr ugrā́ pṛthivī́ cāntárikṣaṃ yé párvatāḫ pradíśo díśaś ca,
yénedáñ jágad vyā́ptaṃ prajā́nān tán me mánaś śivásaṅkalpam astu. ŚSU_12

yénedáṃ sárvaṃ jágato babhūvúr yé devā́ ápi maható jātávedāḥ,
tád evā́gnitápaso jyotír ékan tán me mánaś śivásaṅkalpam astu. ŚSU_13

aciṃtyaṃ cāprameyaṃ ca vyaktāvyaktaparaṃ ca yat,
sūkṣmāt sūkṣmataraṃ jñānaṃ tán me mánaḥ śivasaṃkalpam astu. ŚSU_14

asti vināśayitvā sarvam idaṃ nāsti punas tathaivā dṛṣṭaṃ dhruvaṃ,
asti nāsti hitaṃ madhyamaṃ padaṃ tan me manaḥ śivasaṃkalpam astu. ŚSU_15

asti nāsti viparīto pravāhosti nāsti sarvaṃ vā idaṃ guhyam,
asti nāsti parāt paro yat paraṃ tan me manaḥ śivasaṃkalpam astu. ŚSU_16

parāt parataraṃ yasya tatparāc caiva tat paraṃ,
tatparāt paratojñeyaṃ tan me manaḥ śivasaṃkalpam astu. ŚSU_17

parāt parataro brahma tatparāt parato hariḥ,
tatparāt parato hy eṣa tan me manaḥ śivasaṃkalpam astu. ŚSU_18

gobhir juṣṭo dhanena hy āyuṣā ca balena ca,
prajayā paśubhiḥ puṣkalādyaṃ tan me manaḥ śivasaṃkalpam astu. ŚSU_19

prayataḥ praṇavo nityaṃ paramaṃ puruṣottamaṃ,
oṃkāraṃ param ātmānaṃ tan me manaḥ śivasaṃkalpam astu. ŚSU_20

yo vai vedādiṣu gāyatrī sarvavyāpī maheśvaraḥ,
yad dviruktaṃ tathādvyaiśyaṃ tan me manaḥ śivasaṃkalpam astu. ŚSU_21

yo vai veda mahādevam paramaṃ puruṣottamaṃ,
yaḥ sarvaṃ yasya cit sarvaṃ tan me manaḥ śivasaṃkalpam astu. ŚSU_22

yosau sarveṣu vedeṣu pathate hy aja īśvaraḥ,
akāyo nirguṇo dhyātvā tan me manaḥ śivasaṃkalpam astu. ŚSU_23

kailāśaśikhare ramye śaṃkarasya śubhe gṛhe,
devatās tatra modyaṃti tan me manaḥ śivasaṃkalpam astu. ŚSU_24

kailāśaśikharābhāsā hi bhavad girisaṃsthitāḥ,
nīlakaṃṭhaṃ trinetraṃ ca tan me manaḥ śivasaṃkalpam astu. ŚSU_25

ābrahmastambaparyaṃtaṃ trailokyaṃ sacarācaram,
utpātitaṃ jagad vyāptaṃ tan me manaḥ śivasaṃkalpam astu. ŚSU_26

ya imaṃ śivasaṃkalpam sadā dhyāyaṃti brāhmaṇāḥ,
te paramokṣaṃ gamiṣyaṃti tan me manaḥ śivasaṃkalpam astu. ŚSU_27

tryambakaṃ yajāmahe sugaṃdhiṃ puṣṭivarddhanaṃ,
urvārukam iva baṃdhanān mṛtyor mukṣīya māmṛtāt tan me manaḥ śivasaṃkalpam astu. ŚSU_28

Holder of rights: GRETIL project

Citation Suggestion for this Object: TextGrid Repository (2025). Veda Collection. Śivasaṃkalpopaniṣad. Śivasaṃkalpopaniṣad. GRETIL. GRETIL project. https://hdl.handle.net/21.11113/0000-0016-C98B-9