Vom Han vnd Perlen

Ein Han scharret auff der Misten / vnd fand eine köstliche Perlen. Als er dieselbigen im Kot soligen sahe /sprach er / Sihe / du feines Dinglin / ligstu hie so jemerlich / Wenn dich ein Kauffmann fünde / der würde dein fro / vnd du würdest zu grossen Ehren komen. Aber du bist Mir / vnd Ich dir / kein nütze / Ich neme ein Körnlin oder Würmlin / vnd lies eim alle Perlen. Magst bleiben wie du ligst.

Lere

Diese Fabel leret / das dis Büchlin bey Bawren vnd groben Leuten vnwerd ist / wie denn alle Kunst vnd Weisheit bey den selbigen veracht ist / wie man spricht / Kunst gehet nach Brod. Sie warnet aber / das man die Lere nicht verachten sol.

Vom Wolff vnd Lemlin

Ein Wolff vnd Lemlin kamen on gefehr beide / an einen Bach zu trincken. Der Wolff tranck oben am Bach / das Lemlin aber / fern vnten. Da der Wolff des Lemlins gewar war / lieff er zu jm / vnd sprach / Warumb trübestu mir das Wasser / das ich nicht trincken kan? Das Lemlin antwortet / Wie kan ich dirs Wasser trüben / trinckestu doch vber mir / vnd möchtest es mir wol trüben? Der Wolff sprach / Wie? Fluchstu mir noch dazu? Das Lemlin antwortet / Ich fluche dir nicht. Der Wolff sprach / Ja dein Vater thet mir für sechs Monden auch ein solchs. Du wilt dich Vetern. Das Lemlin antwortet / Bin ich doch dazumal nicht geborn gewest / wie sol ich meins Vaters entgelten? Der Wolff sprach / So hastu mir aber mein Wiesen vnd Ecker abgenaget vnd verderbet. Das Lemlin antwortet / Wie ist das möglich, hab ich doch noch keine Zeene? Ey sprach der Wolff / vnd wenn du gleich viel ausreden vnd schwetzen kanst / wil ich dennoch heint nicht vngefressen bleiben / vnd würget also das vnschüldig Lemlin / vnd frass es.

Lere

Der Welt lauff ist / wer Frum sein wil / der mus leiden / solt man eine Sache vom alten Zaun brechen /Denn Gewalt gehet für Recht. Wenn man dem Hunde zu wil / so hat er das Leder gefressen. Wenn der Wolff wil / so ist das Lamb vnrecht.

Vom Frosch vnd der Maus

Eine Maus were gern vber ein Wasser gewest / vnd kundte nicht / Vnd bat einen Frosch vmb Raht vnd Hülffe. Der Frosch war ein Schalck / vnd sprach zur Maus / Binde deinen Fuss an meinen Fuss / So will ich schwimmen / vnd dich hinüber zihen. Da sie aber auffs Wasser kamen / tauchet der Frosch hinuntern /vnd wolt die Maus ertrencken / In dem aber die Maus sich wehret / vnd erbeitet / fleuget ein Weihe daher /vnd erhasschet die Maus / zeucht den Frosch auch mit heraus / vnd frisset sie beide.

Lere

Sihe dich für / mit wem du handelst. Die Welt ist falsch vnd vntrew vol. Denn welcher Freund den andern vermag / der steckt jn in Sack. Doch schlecht Vntrew allzeit jren eigen Herrn / wie dem Frosch hie geschicht.

Vom Hunde vnd Schaf

Der Hund sprach ein Schaf für Gericht an vmb Brod /das er jm gelihen hette. Da aber das Schaf leugnet /berieff sich der Hund auff Zeugen / die musste man zu lassen. Der erste Zeuge war der Wolff / der sprach /Ich weis / das der Hund dem Schaf Brod gegelihen hat / Der Weihe sprach / Ich bin dabey gewest. Der Geir sprach zum Schaf / Wie tharstu das so vnuerschampt leugnen? Also verlor das Schaf seine Sache /vnd musste mit schaden zur vneben zeit seine Wolle angreiffen / damit es das Brod bezalet / das es nicht schüldig worden war.

Lere

Hüt [8] dich vor bösen Nachbarn / oder schicke dich auff Gedult / wiltu bey Leuten wonen / Denn es gönnet niemand dem andern was Guts / das ist der Welt lauff.

Vom Hunde im Wasser

Es lieff ein Hund durch einen Wasserstrom / vnd hatte ein stück Fleisch im Maule / Als er aber den schemen vom Fleisch im Wasser sihet / wehnet er / es were auch Fleisch / vnd schnappet girig darnach. Da er aber das Maul auffthet / empfiel jm das stück Fleisch / vnd das Wasser fürets weg. Also verlor er beide /dãs Fleisch vnd schemen.

Lere

Man sol sich benügen lassen an dem / das Gott gibt. Wem das wenige verschmahet / dem wird das Grösser nicht / Wer zu viel haben wil / der behelt zu letzt nichts / Mancher verleuret das gewisse / vber der vngewissen.

Gewalt.

Es geselleten sich ein Kind / Ziegen vnd Schaf zum Lewen / vnd zogen mit ein ander auff die Jaget / in einen Forst / Da sie nu einen Hirs gefangen / vnd in vier Teil gleich geteilet hatten / sprach der Lewe / Ir wisset / das ein Teil mein ist / als ewrs Gesellen / Das ander gebürt mir / als eim Könige / vnter den Thieren / Das dritte wil ich haben darumb / das ich stercker bin / vnd mehr darnach gelauffen vnd geerbeitet habe / denn jr alle drey / Wer aber das vierdte haben wil /der mus mirs mit gewalt nemen. Also mussten die drey für jre mühe / das Nachsehen / vnd den schaden zu Lohn haben.

Lere

Fare nicht hoch / Halt dich zu deines Gleichen / Dulcis inexpertis cultura potentis Amici. Es ist mit Herrn nicht gut Kirsschen essen / sie werffen einen mit den Stielen. Vlpia L. Si non fuerint. Das ist ein Geselschafft mit dem Lewen / wo einer allein den Genies /der ander allein den Schaden hat.

Diese Fabel ist auff ein ander Weise also gestellet.

Ein Lewe / Fuchs vnd Esel iagten mit einander / vnd fiengen einen Hirs. Da hies der Lewe den Esel das Wilpret teilen / Der Esel macht drey Teil / des ward der Lewe zornig / vnd reis dem Esel die Haut vber den Kopff / das er blutrüstig da stund / Vnd hies den Fuchs das Wilpret teilen / Der Fuchs sties die drey Teil zusamen / vnd gab sie dem Lewen gar. Des lachet der Lewe / vnd sprach / Wer hat sich so leren teilen? Der Fuchs zeiget auff den Esel / vnd sprach / Der Doctor da im rotten Parret.

Diese Fabel leret zwey Stücke

Das erste / Herrn wollen vorteil haben / vnd man sol mit Herrn nicht Kirsschen essen / sie werffen einen mit den Stilen / Das ander / Felix quem faciunt aliena pericula cautum. Das ist ein weiser Man der sich an eines andern Vnfal bessern kan.

Vom Diebe.

Es freiet eins mals ein Dieb / vnd seine Nachbarn waren frölich auff seiner Hochzeit / den sie hoffeten /er würde hinfurt from werden. Da kam ein klüger man dazu / vnd als er sie so in freuden sahe / sprach er /Sehet zu / seid nicht allzu frölich. Die Sonn wolt auch ein mal freien / Des erschrack alle Welt / vnd ward so vngedultig / das sie auch in der Himel fluchet vnd schald.Es fragt Jupiter aus dem Himel / Was das fluchen bedeutet. Da sprach alle Welt / Wir haben jtzt ein einige Sonne / vnd die thut vns mit jrer Hitze so viel zu leide / das wir schier alle verderben / Was wil werden wenn die Sonne mehr Sonnen zeugen wird?

Diese Fabel zeigt der Welt

Man darff den Teuffel vber die Thür nicht malen /Gris schlecht gern nach gramen / Ein Dieb zeugt den andern. Hilff frome Leute mehren / [9] Der Bösen ist sonst zu viel. Mancher schalck wird durch fromme Leute gefördert / der darnach seines Gleichen an sich zeucht / Landen vnd Leuten sehr schedlich ist / Darumb sihe dich für / wem du rahten oder helffen solt /An frembden Kindern vnd Hunden (spricht man) ist das Brod verloren.

Vom Kranich vnd Wolffe.

Da der Wolff eins mals ein Schaf geiziglich fras /bleib jm ein Bein im Halse vber zwerch stecken /dauon er grosse Not vnd Angst hatte / Vnd erbot sich gros Lohn vnd Geschenck zu geben / wer jm hülffe. Da kam der Kranich / vnd sties seinen langen Kragen dem Wolff in den Rachen / vnd zoch das Bein eraus. Da er aber das verheissen Lohn foddert / sprach der Wolff / Wiltu noch Lohn haben / Dancke du Gott /das ich dir den Hals nicht abgebissen habe / du soltest mir schencken / das du lebendig aus meinem Rachen komen bist.

Diese Fabel zeigt

Wer den Leuten in der Welt wil wol thun / der mus sich erwegen Vndanck zuuerdienen / Die Welt lohnet nicht anders / denn mit Vndanck / wie man spricht. Wer einen vom Galgen erlöset / Dem hilfft derselbige gern dran.

Vom Hund und der Hündin.

Eine schwangere Hündin / bat mit demütigen Worten / einen Hund / das er jr wolt sein Heuslin gönnen / bis sie geworffen hette / Das that der Hund gerne / Da nu die jungen Hündlin erwuchsen / begert der Hund sein Heuslin wider / aber die Hündin wolte nicht / Zu letzt drewet jr der Hund / vnd hies sie das Heuslin reumen / Da ward die Hündin zornig / vnd sprach / Bistu böse / so beis vns hinaus.

Diese Fabel zeigt

Wenn die Laus in grind komet / so macht sie sich beschissen / Sihe wie du des Bösen los werdest / wens vberhand kriegt. Der Teufel ist gut zu Gast zu bitten /Aber man kan sein nicht wol los werden.

Von D Mogenhofer.

Es begegenet einmal ein schinder dem grossen doctor N Mogenhofer / grusset yhn vnd sprach / Gott ehre das handwerck / lieber freund / Der doctor sprach wie bistu meines odder ich deines handwercks / Der Schinder sprach / Yhr seid ein Jurist / vnd ich ein schinder So schinde ich todte hünde / vnd yhr schindet lebendige leute.

Grobe

Vom Esel vnd Lewen.

Der Esel ward auch ein mal Bawrkündig / vnd als er einem Lewen begegnet / grüsset er jn hönisch / vnd sprach / Ich grüsse dich Bruder. Den Lewen verdros der hönissche Grus / dacht aber bey sich selbs / Was sol ich mich an dem Schelmen rechen / Ich schelte oder zureisse jn / so lege ich kein Ehre ein / Ich wil den Narren lassen faren.

Lere

Hoc scio pro certo / quod si cum stercore certo /Vinco uel uincor / semper ego maculor. Wer mit eim Dreck rammelt / Er gewinne oder verliere / so gehet er beschissen dauon.

Von der Stadmaus vnd Feldmaus.

Ein Stadmaus gieng spaciren / vnd kam zu einer Feldmaus / die thet jr gütlich / mit Eicheln / Gersten /Nüssen / vnd womit sie kund. Aber die Stadmaus sprach / du bist eine arme Maus / was wiltu hie in Armut leben / Kome mit mir / ich will dir vnd mir gnug schaffen / von allerlei köstlicher Speise. Die Feldmaus zog mit jr hin / in ein herrlich schön Haus /darin die Stadmaus wonet / vnd [10] giengen in die Kemnoten / da war vol auff / von Brod / Fleisch / Speck /Würste / Kese / vnd alles / da sprach die Stadmaus /Nu iss vnd sey guter ding / solcher Speise hab ich teglich vberflüssig.

In des kömpt der Kelner / vnd rumpelt mit den Schlüsseln an der thür / Die Meuse erschracken vnd lieffen dauon / Die Stadmaus fand bald jr Loch / Aber die Feldmaus wüsste nirgend hin / Lieff die wand auff vnd abe / vnd hatte sich jres Lebens erwegen.

Da der Kelner wider hinaus war / sprach die Stadmaus / Es hat nu kein Not / las vns guter ding sein. Die Feldmaus antwortet / Du hast gut sagen / du wusstest dein Loch fein zu treffen / dieweil bin ich schier für Angst gestorben. Ich wil dir sagen was die meinung ist / Bleibe du eine reiche Stadmaus / vnd fris Würste vnd Speck / Ich wil ein armes Feldmeuslin bleiben / vnd mein Eicheln essen / Du bist kein Augenblick sicher für dem Kelner / für den Katzen /für so viel Meusefallen / vnd ist dir das gantze Haus feind / solchs alles bin ich frey vnd sicher in meinem armen Feldlöchlin.

In grossen Wassern fehet man grosse Fissche /Aber in kleinen wassern fehet man gute Fisschlin. Wer Reich ist hat viel Neider / Sorge / Fahr.

Vom Raben vnd Fuchse.

Ein Rab hatte einen Kese gestolen / vnd satzte sich auff einen hohen Baum / vnd wolte zeren / Als er aber seiner art nach nicht schweigen kan / wenn er isset /höret jn ein Fuchs vber dem Kese kecken / vnd lieff zu / vnd sprach / O Rab / nu hab ich mein lebtag nicht schöner Vogel gesehen / von Feddern vnd Gestalt /denn du bist. Vnd wenn du auch so eine schöne Stimme hettest zu singen / so solt man dich zum Könige krönen / vber alle Vögel.

Den Raben kützelt solch Lob vnd Schmeicheln /fing an / wolt sein schönen Gesang hören lassen / vnd als er den Schnabel auffthet / empfiel im der Kese /den nam der Fuchs behend / fras jn / vnd lachet des thörichten Rabens.

Hüt