Er hats dem rechten gethon.
Er hat seinn gleich gefunden.
Vulpinari cum uulpe.

Er hat nit an der rechten thür anklopffet.

Man můß fuchs mit fuchs fahen. Schleck mit schleck fahen. Wer einn schalck wil fahen / der můß einn schalck an die lucken stellen. Es ist ein fuchs ann andern. Man spricht: Der Teufel hat ein gleichs gworffen / wann böß auff böß / ein naß kind auff das ander stoßt. Ist er kein schalck / so weyß er doch wie eim schalck vmbs hertz ist. Es sücht keiner keinn hinderm ofen / oder in eim sack / er sei dann zuuor darhinder / oder drinn gesteckt. Es ist böß stelen / wo der Würt ein dieb ist. Also nennt man böse hinder listige leut / die einer iedē lauß ein steltzen können machen /das recht zu vnrecht / vnd iedem zaunstecken einn hůt auffsetzen / vnd ja für iede flaschen einn zapffen finden. Füchs / alt füchs.